专家拆局：慕逊加柏上盘抵撑

崇尚进攻追击贺芬咸

德甲战队喺啱啱周中嘅欧洲赛场交出满分成绩，5支参赛队伍喺淘汰赛首回合全部赢波，不过多蒙特同RB莱比锡喺欧联嘅胜仗都唔算轻鬆，而利华古逊、法兰克福同禾夫斯堡更要分心下周中嘅欧霸次回合比赛，今轮联赛无论体能恢复同教练轮换都存在变数，黑柴只抱观望态度。

今晚出击重心，落喺唯一冇欧战任务嘅劲旅慕逊加柏身上，佢哋近况回勇主场够正气，今晚仲有首席射手柏利亚停赛期满复出，夫添够杀态沉防线洩嘅贺芬咸，慕逊加柏让半一，黑柴撑上盘。

慕逊加柏上半季曾连续8星期位居榜首，新帅马高路斯带嚟嘅新战术阵式崇尚进攻，而且收到效果，令唔少拥趸重现阔别咗43年嘅德甲冠军梦，不过佢哋唔及拜仁、多蒙特同莱比锡嘅地方，係缺乏可以凭一己之力扭转形势嘅巨星，而且作客表现飘忽，排名一度跌出前4。不过欧霸出局对佢哋嚟讲反而係重新振作嘅契机，球队近3仗共抢7分合共轰入9球，表现每仗都有进步之馀，几名前线锋将轮流爆发，今晚多番把握力强嘅柏利亚攻坚，仲重返喺德甲已经8连胜嘅强项主场出击，当然更有赢波信心。

贺芬咸防线多甩漏

客军贺芬咸一向係神经刀，凭一招稳守快速突击，作客曾收服唔少强队，不过近期防线明显大跌Watt，两连败之馀，上轮面对锋力平庸嘅禾夫斯堡仲因为连番犯错而两送12码，年轻中坚史提芬普舒连场孭镬成箭靶。贺芬咸呢排基础嘢稳守都做唔到，作客普鲁士公园球场难望抢分。