专家拆局：车仔反客为主捉海鸥

2020年英超第一击，周三晚上白礼顿主场挑战车路士。车仔今季客场表现远胜主场，尤其造访实力较弱嘅对手绝冇甩拖，况且「海鸥」白礼顿遇强即屈，呢场都唔慌会抢到分，客胜係不二之选。

车路士继早前以2比0轻取热刺之后，上场再以2比1反胜阿仙奴，连续2次喺作客情况下喺「伦敦打吡」赢波，其中前锋谭美阿巴谦上仗又有士哥，状态勇锐。事实上，车仔客场成绩明显叻过主场，开咧至今作客已取得21分，远多过主场嘅14分，对手坐镇主场同样主动出击，明显益咗一班车仔攻击好手，畀佢哋有更多空间发挥进攻才能，表现自然较为理想。

白礼顿遇强唔硬撼

白礼顿快车期3战得1胜2负，无论状态同战力均不及车路士，而且白礼顿不嬲有「拣波踢」嘅习惯，尤其面对圣诞新年密集赛程，「海鸥」为保留体力，遇上超班对手都派出副选应战，留力同实力更接近嘅球队搏杀，佢哋嚟紧足总盃要对锡周三，大有机会过关，领队朴达或会再收起部分主力。况且两军近5次联赛碰头，车仔获得全胜佳绩，白礼顿难有复仇本钱，一于捧车路士客胜。