摘要：决赛次回合睇定搏拳今晚亚冠盃决赛爆发次回合，日职球队浦和红鑽返埼玉主场再斗沙特劲旅希拉尔。红鑽喺首回合全场捱打，只输1粒已经偷笑，就算想收复失地，都要先稳住防守；希拉尔领先紧一定睇定嚟食，加上近7届亚...
决赛次回合睇定搏拳
今晚亚冠盃决赛爆发次回合，日职球队浦和红鑽返埼玉主场再斗沙特劲旅希拉尔。红鑽喺首回合全场捱打，只输1粒已经偷笑，就算想收复失地，都要先稳住防守；希拉尔领先紧一定睇定嚟食，加上近7届亚冠盃决赛劲旺半场和，不妨追多铺。
红鑽喺首回合因西川周作坐波监，把关嘅二号门将福岛春树出迎犯错，导致以0比1落败，想延续由日职球队称霸亚洲嘅势头（对上两届分别由红鑽及鹿岛封王），今仗不容有失。但观乎首回合红鑽全场捱打嘅表现，控球率唔够3成，希拉尔则有多达22次射门，红鑽得嗰两次，冇大败而回已经执番身彩，就算今场想反胜夺冠，但都要有自知之明，毕竟呢支日职球队向来唔擅于强攻，连联赛在内近3场均交白卷，既然依家只係落后1球，即使有成6万主场观众呐喊打气，都多数先巩固防守，睇准机会再出击。
受过教训 希拉尔唔急
希拉尔有前意大利国脚基奥云高、以及前法国国脚巴菲迪比高美斯坐镇，实力唔讲得笑，当中高美斯更以10粒位居亚冠盃射手榜榜首，级数绝对超晒班。不过两年前双方曾喺决赛碰头，当时希拉尔首回合同样先于主场出击，但只能打和1比1，次回合作客焗攻下以0比1落败，吸取上次教训，依家希拉尔有1球在手，和波都捧盃嘅形势下，梗係唔会乱咁攻。
再睇埋呢项赛事嘅数据，原来连同今届决赛首回合，近7届亚冠盃首、次回合共13场比赛，全部开半场和，可见大家都唔想喺先失波而陷于被动，初段例必稳打稳扎，留待下半场先搏杀，半场和旺到晕值得再追。
