专家拆局：祖记歎慢板半和有揸拿

今晚祖云达斯快车赛程于主场出击，迎战热拿亚。两军睇落实力悬殊，但祖记喺联赛踢法慢热；热拿亚主打逼抢，随时偷鸡顶到半场，不妨冷敲半场和。

祖记已连续8季称霸意甲，加上近年不断签入C朗等球星，实力上喺国内超晒班，开季8场联赛获7胜2和，今季虽有国际米兰稍作威胁，但其他球队似乎仍未搵到对付「老妇人」嘅方法。因此祖记近几季焦点都放喺欧联度，所以好多时踢联赛都稍为放慢脚步，或半力出击，例如C朗上场对莱切就休息唔使踢，今场先至复出。

热拿亚怪阵顶得两嘴

此外祖记今季由新帅沙利掌舵后，众将明显未适应佢嘅传控打法，经常空有控球优势，入肉埋门唔多，呢个情况喺比赛初段尤其明显，近7场联赛有6次开半场和，其中2次更係先失波之下追和，最终下半场发力至赢波，表现唔算标青。

热拿亚今季开局劲曳，经过近6场联赛不胜沦为护级分子后，主帅安祖亚苏利落镬，球会委任圣日耳门U19教练莫达顶替，啱啱喺新帅效应下即以3比1击败布雷西亚，总算开到斋。虽然呢位前热拿亚名将执教经验尚浅，但佢早前自创2-7-2阵式，强调全体逼抢，特别初段有气有力下，要巩固防守唔难，造访慢热嘅祖记，半场和值得再追。