专家拆局：德军强阵够炒爱沙尼亚

一周双赛捧完对家撑番佢

欧洲国家盃外围赛C组榜首双雄分途出师，暂列次名嘅德国作客对榜尾爱沙尼亚，基于呢组3强荷兰、德国同北爱尔兰同积12分，德国喺对赛成绩输咗畀荷兰，为确保前两名出线资格，今场冇失分空间，好在佢哋今年一周双赛表现例牌第2场好过第1场，黑柴上周三晚捧完德国对家，今晚德国强阵遇弱就要撑番佢，「让球主客和」德国让到3球，都照捧让球客胜。

德军啱啱喺主场两球领先下畀阿根廷逼和，但该役领队勒夫志在试阵，中坚罗宾高治、前锋禾特舒密特、中场拿迪安阿美利同苏奥沙达都如愿首次为国家队上阵，24岁嘅拜仁中场甘美治亦为首度担任国家队队长而高兴。不过今晚踢正式赛事，主将纽亚、马高列奥斯、迪姆华拿同根度简都会复出，而且佢哋今年每遇一周双赛，第2场成绩总好过第1场，睇番对手爱沙尼亚今届欧国外主场3战皆北共失8球，德军6月主场曾经大炒过佢哋8蛋，今场作客就算打个5折，都足以开出让球客胜，更何况畀勒夫改造成正中锋嘅基拿比近期仲着晒火添！

荷兰征白俄等下半场走地

至于榜首荷兰喺稍早时间作客白俄罗斯，荷兰欧国外3连胜共轰11球，包括击败德国同北爱两支争出线劲敌，前线迪比同赖恩巴布都弗爆，不过要留意佢哋惯性慢热，呢11个入球得1个係上半场取得，当中7球更喺完场前15分钟至入，对德国同北爱都係落后下反胜。今晚面对近5仗主场只失3球，仅负0比2同0比1畀德国及北爱嘅白俄罗斯，早段战情随时胶着。基于白俄入球能力低，半场细赔率又冇肉食，黑柴建议先小敲2.85倍荷兰赢1比0嘅半场波胆，到下半场等白俄战将开始攰，睇啱形势再走地捧大盘。