专家拆局：常规赛煞科伐木者无惧地震

周一凌晨美职常规赛煞科战，12场赛事同时开打，其中西岸波特兰伐木者主场对圣荷西地震，双方为争季后赛资格，定必搏尽目标擸晒3分，可惜地震作客战绩实在不敢恭维，呢场焗攻导致后防空虚，随时益咗伐木者，主胜值博。

赛制上，东西两岸头7位可以跻身季后赛，惟东岸第8位嘅芝加哥火燄已落后第7位嘅新英伦革命达6分，所以呢个煞科日对东岸球队嚟讲只係排名之争。相反，西岸情况就激得多，目前伐木者虽排第6，但比起今场对手、排第8嘅地震只係多2分咁大把，今仗如果输波随时功亏一篑，好彩佢哋有前美职最佳球员华拿里同施巴斯坦白兰高两位阿根廷中场孖宝压阵，整体质素有保证，况且地震近6场作客输晒，仲有主力汤美汤臣停赛缺阵，呢场想抢分都几难，睇好伐木者赢波入季后赛。

FC达拉斯W「肯」定得

同时间开波嘅仲有FC达拉斯主场斗肯萨斯体育会，排西岸第7嘅FC达拉斯近4仗主场取3胜1和气势如虹，今仗只要赢波即可锁定做「前七」，万一前面嘅伐木者有乜闪失输波，仲有机会微升1位，所以一定唔会放软手脚。反观对手肯体会非但无缘季后赛，战意成疑，加上主力中场罗渣艾斯宾路沙同伊利山齐士齐齐坐波监，FC达拉斯呢口主胜值得捧场。