摘要：教练想轮换双箭唔肯抖前日係德国国庆，德甲球队基本上都畀球员休息，不过近期着晒火嘅拜仁双箭基拿比同罗拔利云度夫斯基，就有得抖都唔肯抖，原本拜仁今晚主场对贺芬咸嘅德甲，教练尼高高华打算畀佢哋轮休，但两人都...
教练想轮换 双箭唔肯抖
前日係德国国庆，德甲球队基本上都畀球员休息，不过近期着晒火嘅拜仁双箭基拿比同罗拔利云度夫斯基，就有得抖都唔肯抖，原本拜仁今晚主场对贺芬咸嘅德甲，教练尼高高华打算畀佢哋轮休，但两人都请缨继续担正，整定态沉兼残阵嘅贺芬咸唔好彩，拜仁狂炒热刺后勒都勒唔住，今晚遇弱让到两球半、三球都要追上盘。
拜仁双箭係近期全欧洲最火热球员，基拿比上轮联赛对柏达邦一射一传原来只係小儿科，刚周中欧联作客热刺食出大四喜，立即成为全球热话；至于罗拔仔对热刺亦梅开二度，今季3线作战保持场场入波，9场比赛共轰入14球。教练尼高高华原本打算今晚大轮换，点知两人就要求继续踢，不过拜仁都会畀近期上阵时间较少嘅汤马士梅拿、比列锡、哥伦天杜利素同查维马天尼斯更多表现机会，呢班副选本身质素唔使怀疑，近期少踢自然更加抢缰，有足够动力继续争取大胜保持近期强势。
残阵贺芬咸今非昔比
贺芬咸今季3线大失血，仲畀人撬走埋教头拿高士文，黑柴季初已经讲明要撑佢哋对家，果然开季6场联赛只得5分，搞到新帅舒路达开始面临信任危机，球队人脚今非昔比，除流失咗祖连顿、迪米亚巴尔、尼高舒侯斯等主力外，仲伤兵满营，一对最有威胁射手卡拉马历同贝迪迪尔，仲有中场沙马斯高同史堤芬苏巴都要养伤，后防大哥奇云禾治上轮对慕逊加柏伤出上阵成疑，既然上轮主场都要吞慕逊加柏3蛋，今晚作客面对班霸拜仁，仲有近3次对赛都射破佢哋大门嘅罗拔仔，想输少当赢恐怕都几难。
