专家拆局：阿仙奴格食格明屈机

今晚英超压轴尾场，阿仙奴作客硬撼「大黄蜂」屈福特。阿仙奴虽有箭头拿卡锡迪因伤倦勤，但正好畀贵价新兵尼高拉斯比比表演机会，屈福特开季脱脚兼易帅，未必可立即重上正轨，加上近3次碰头阿仙奴赢晒，格食格之下客胜有计。

比比放弃国际赛志切发威

阿仙奴赛前收到坏消息，箭头拿卡锡迪因为左脚足踝受伤，至少要抖到10月。不过主帅艾美利惊都未惊过，一来阵中小将如古安杜斯、啱啱续长约嘅祖尔韦洛克坚sharp醒，二来贵价新兵尼高拉斯比比仲未开斋，话冇压力就假嘅，有传佢「诈伤」特登唔踢早前国际赛，就係一心想尽快融入阿仙奴，犹记得当年「高贝利大帝」亨利加盟头几场都冇波入，直至9月中对修咸顿先至开斋，但就係呢个士哥，释放晒所有压力即入球停不了，比比梗係想效法前辈旧路，尽快入波打破心魔，咁啱依家又係9月中，趁住拿卡锡迪缺阵係时候发威。

屈福特近3对赛全败零入球

上季带领屈福特取得英格兰足总盃亚军嘅主帅查维加西亚，今季头4场联赛只得1和3负，沦落包尾而惨食无情鸡，成为今季首位被炒嘅英超领队。虽然佢哋搵番科里斯回巢掌舵，但呢位教头之前转战中超及执教爱斯宾奴都唔太成功，能否立即执掂队波实属疑问，而且「阿仙奴剋星」迪尼上月尾接受膝部手术，今仗肯定倦勤，攻力削弱。何况两军近3次碰头，阿仙奴赢晒兼冇失波，摆明格食格喇，客胜有买趁早。