专家拆局：阿特兰大输经验啃唔落华伦

今晚另一场欧联16强首回合，意甲球队阿特兰大喺圣西路中立场斗西甲代表华伦西亚；阿特兰大虽然係今季意甲进攻王，不过嚟到欧联淘汰赛却係另一回事；华伦今届3场作客分组赛未输过，而且论欧战经验远胜「初哥」阿特兰大，华伦受让必捧让球客胜。

阿特兰大係欧联新丁，今届分组赛喺头3轮输晒情况下，最终能够跻身16强，令唔少人大跌眼镜，其实阿特兰大分组赛整体表现唔算突出，能够出线最关键係第4轮可以喺曼城身上攞到1分，睇番当时曼城3战全胜手执9分，争胜决心唔大，所以有机会畀阿特兰大偷到鸡。阿特兰大今季喺意甲24场联赛攻入63球，係全意甲入波最多球队，不过当中只有6场冇失波，防线绝对唔稳阵，嚟到欧联淘汰赛，防守比进攻更为重要，如果阿特兰大防线表现冇大改善，随时入埋唔够后面输。

华伦分组赛作客不败

华伦西亚今届分组赛同车路士、阿积士及里尔同组，赛前亦不被睇好可以出线，点知佢哋6战得11分，更凭较佳对赛压过车路士攞到小组首名，其中分组赛3场作客获2胜1和，显示踢下风波特别有计。华伦对上一次出战欧联16强係2012/13球季，就算之前两次喺欧联分组赛出局，最后都能以小组第3名转战欧霸盃，论欧战经验好过阿特兰大成条街。再者，今场移师米兰圣西路球场上演，阿特兰大分组赛喺呢度3战仅得1胜，地利都冇埋更唔乐观，华伦受让值得支持。