专家拆局：曼联强阵誓破屈福特

英超早场曼联作客屈福特，「红魔」近期进攻表现有起色，为返前列位置，对住英超包尾大幡屈福特必定强阵出击，一于热捧客胜。

曼联今个圣诞快车，4场联赛有3场作客，今场造访屈福特后，嚟紧要喺主场对纽卡素，以及作客般尼同阿仙奴，除咗包艇嘅屈福特之外，其馀3场对手都係中游，同曼联只有3至4分差距，今轮对住弱旅屈福特，曼联势必全力争胜。

普巴离队前唔会再上阵

面对连场大战，曼联人脚储备势必受到考验，赛前「红魔」今季长期养伤嘅中场保罗普巴已经复操，本来对曼联係好消息，点知近日英国《镜报》爆料，指曼联有球员同工作人员都认为呢位法国中场已经唔会再为「红魔」上阵，仲话普巴1月转会市场重开就会离队，令人揣测佢喺球队嘅前途。好彩「红魔」近期表现有起色，近3仗联赛取2胜1和，包括先后击败热刺同曼城两大劲敌，其中拉舒福特个人独取3球，状态够Sharp醒，有力带领曼联继续抢分。

相反积分榜跌落谷底嘅屈福特，虽然早前揾嚟今季第3任主帅尼祖皮亚臣接手球队，可惜呢位前李斯特城教头似乎未能为「大黄蜂」度到赢波妙计，上任后2仗仅取1和1败。最惨係屈福特近5仗只係入得1球，今季联赛踢到嚟第18轮，总共只入得9球，唔止係英超入球数最少嘅球队，仲係欧洲5大联赛攻力最弱嗰队，咁嘅表现根本冇得同近况回勇曼联周旋，捧番客胜好过。