专家拆局：西维尔强势擒皇

洛佩特吉倒戈大报复

周一凌晨西甲压轴大战，西维尔主场恶斗皇家马德里。西维尔今季喺前皇马主帅洛佩特吉带领下，表现更上一层楼，呢名前国家队主帅上季喺皇马惨食无情鸡，今次强势倒戈定必大打争气波，何况呢队波近年主场恰惯皇马，受让平半必捧下盘。

未计周日凌晨赛果，西维尔开季4战3胜1和排榜首，皇马则以2胜2和排第3，论整体表现，西维尔联赛4战仅失1球，比起皇马场场有失波、加埋失6球，西维尔明显稳定得多。而且西维尔啱啱喺欧霸盃作客大胜卡拉巴克3比0，相反皇马作客巴黎圣日耳门却惨吞3蛋，并耻辱性录得全场零射门中龙，士气、状态高下立见。

近季主场联赛交手赢晒

洛佩特吉上季接掌皇马战绩低落，最终喺国家打吡惨败1比5后被炒，不过呢段不快经历似乎无损佢嘅教波信心，今季佢过档西维尔，引入奥甘波斯、利古朗及祖安佐敦等勐将，火速融入球队，尽显执教功力；反而皇马主帅施丹「魔法失灵」，新加盟嘅夏萨特、卢卡祖域、洛迪高高斯表现全喺水准之下，对呢支开始老化嘅球队完全冇帮助。

更重要嘅係，西维尔主场称得上皇马凶地，「银河舰队」对上4季联赛作客嚟到都要放低3分，以目前皇马嘅状态实在冇本钱让波，下盘可放心捧场。