摘要：周六晚德甲重头戏，班霸拜仁慕尼黑作客火併剋星贺芬咸，拜仁王牌射手罗拔利云度夫斯基缺阵，前线入球能力当然有影响，不过球队正准备同教练汉斯弗利克续约，众将势必拚尽为呢位深受佢哋拥戴嘅主帅造势，加上要报首循...
周六晚德甲重头戏，班霸拜仁慕尼黑作客火併剋星贺芬咸，拜仁王牌射手罗拔利云度夫斯基缺阵，前线入球能力当然有影响，不过球队正准备同教练汉斯弗利克续约，众将势必拚尽为呢位深受佢哋拥戴嘅主帅造势，加上要报首循环主场败辱，今晚作客战意高昂，黑柴推介让球客胜。
拜仁近期强势没法挡，近9轮德甲8胜1和重返榜首之馀，欧联16强首回合亦作客大炒车路士3蛋，令会方对季尾约满嘅教练汉斯弗利克非常满意，较早前喺佢庆祝55岁生辰时，主席路明尼加送上一支名笔，话方便佢喺重要文件上签名，仲有消息话拜仁会喺下月19日主场对车路士赛后同佢续长约，弗利克深得球员爱戴，众将当然想喺佢续约前为佢造势，斗志加零一。
贺芬咸伤「锋」严重
拜仁赛前传嚟坏消息，王牌射手罗拔利云度夫斯基喺作客车路士后验出左膝胫骨轻微骨折，要养伤4周，若面对顶级劲旅或者有较大影响，但阵中始终仲有基拿比同汤马士梅拿等质态兼备「士哥拿」， 对住德甲中游球队绝对游刃有馀。
贺芬咸今季首循环曾作客爆冷赢拜仁2比1，月初德国盃作客亦仅输3比4，但睇番呢两仗5个入球，1个係拜仁中坚谢路美保定摆乌龙，另外4球分别由好波之人阿达美恩同新加盟嘅以色列射手摩尼斯达保射入，可惜呢两位射手，加埋上季主力箭头贝科迪尔，今晚都因伤缺阵，连首席射手卡拉马历都有伤在身，伤「锋」程度比拜仁更严重。贺芬咸近3轮德甲只得1分，上轮斗慕逊加柏绝对劣势下补时逼和对手超好运，今晚面对级数更高嘅拜仁，过到初一未必过到十五嘞！
